Falamos con Fátima Rodriguez, directora de Promove Consultoría, unha empresa moi implicada nas áreas de turismo e accesibilidade e que traballa man a man xunto con Cabanas sen Barreiras nos eidos de accesibilidade para todos neste proxecto.

Fixémoslle unhas preguntiñas sobre que é a accesibilidade e como se reflicte en Cabanas sen Barreiras e estas son as súas respostas:

Poderías falarnos sobre que podemos entender por Turismo Accesible, ou Turismo para Todos?

“A Organización Mundial do Turismo (OMT) entende a calidade do turismo como “o resultado dun proceso que implica a satisfacción de todas as necesidades, esixencias e expectativas lexítimas dos consumidores respecto dos produtos e servizos, a un prezo aceptable, de conformidade coas condicións contractuais mutuamente aceptadas e cos factores subxacentes que determinan a calidade tales como a seguridade, a hixiene, a accesibilidade, a transparencia, a autenticidade e a harmonía dunha actividade turística preocupada pola súa contorna humana e natural”.

Tal é a importancia actual do turismo accesible, que a Secretaría de Estado de Turismo consciente da importancia do Turismo Accesible Turismo para Todos decidiu incluílo no Plan do Turismo Español Horizonte 2020.

O concepto de turismo accesible baséase, polo tanto, sobre o principio de que o turismo é un dereito social fundamental para todos e todas, a saber, o dereito da igualdade de oportunidades, á non discriminación e á integración social, xa que para as persoas con discapacidade, tanto como para todas as demais, as actividades comprendidas baixo as categorías de lecer e turismo son fundamentais para a calidade de vida.”

Fátima, de Promove

Como se aplican os principios de Turismo Accesible / Turismo para todos neste proxecto de Cabanas sen Barreiras?

“Do Artesanato mantén o seu compromiso e aposta pola calidade turística no desenvolvemento do proxecto das Cabanas sen Barreiras, conscientes de que a accesibilidade turística é hoxe en día un factor intrínseco á calidade turística, e xa non se pode concibir un turismo de calidade, cando este non está ao alcance de todos/as. O turismo de calidade debe ser accesible a todas as persoas e ninguén poderá quedar á marxe deste por ningunha razón ou circunstancia. É por este motivo polo que tanto no deseño como na rehabilitación dos aloxamentos, prevalecen os criterios técnicos que fan accesibles tanto os espazos dos aloxamentos coma o seu uso, contemplándose en todo momento o principio da Accesibilidade Universal.”

Como foi para Promove esta experiencia de traballo xunto con un referente en innovación turística como é Do Artesanato?

“As persoas que traballamos en Promove temos experiencia no desenvolvemento de proxectos nas áreas de Emprendemento, Turismo e Desenvolvemento Local. O equipo humano é o valor fundamental da empresa.

Promove, proxectos e persoas. Ese é o noso lema porque detrás de calquera iniciativa social ou empresarial existen persoas. Baixo o hashtag #promovendoactitudes, en Promove identificamos e establecemos alianzas con aquelas persoas coas que compartimos filosofía. O enfoque sostible, accesible e con perspectiva de xénero son os compromisos e actitudes que buscamos para establecer esas alianzas, e o equipo humano de Do Artesanato leva anos apostando e demostrando o compromiso por estes valores sociais e medioambientais.

Ademais, neste caso coincide que eu son de Muros, así que coñezo a experiencia empresarial de Do Artesanato dende hai moitos anos. Esta vinculación persoal co destino Muros-Noia permitiunos facer seguimento da evolución dunha experiencia que a día de hoxe é unha referencia do Emprendemento sostible, accesible e innovador no sector turístico galego.

En definitiva, para nós é un orgullo coñecer e colaborar cos proxectos que se veñen desenvolvendo nos últimos anos por parte de Do Artesanato.”

Queda moito por avanzar en Turismo Accesible, cales pensas que serán os futuros pasos que a sociedade e o tecido empresarial darán, ou deberían de dar nesta materia?

“O Turismo Accesible debe ser un compromiso de toda a sociedade, do tecido empresarial e das administracións públicas. As empresas teñen un compromiso coa accesibilidade, pero en moitos casos require dun investimento que, en períodos de crise, non sempre é fácil de asumir. Por iso é tan importante o apoio das administracións públicas para facilitar que as empresas podan acometer as obras necesarias para facer accesibles os establecementos a persoas con mobilidade reducida.

No caso de diversidade funcional sensorial (persoas cegas e xordas), as adaptacións para facer accesible a oferta turística depende, unha vez mais, das persoas que exercen de anfitrioas, así que o reto para os profesionais do turismo é a calidade humana tan necesaria para converter un servizo nunha experiencia turística.”

Estas eran as reflexións de Fátima Rodríguez sobre accesibilidad, moitas gracias por compartilas con nós.