Houbo un tempo no que os corvos falaban, contaban historias fantásticas sobre os seres máxicos que vivían nos bosques de Galicia…pero hai un lugar na fin do mundo donde un corvo vai contar unha nova historia. 

É a historia do soño de Manuel e China, facéndose realidade.

Somos Manuel e China, e pensamos que vivir, disfrutar e facer medrar o medio rural é posible para nós, para vós, para todos. Por iso, desde xa fai unhas décadas, traballamos por e para a nosa contorna, desde o noso proxecto “Cabañitas del Bosque”, que moitos de vós seguro xa coñecedes.

Agora queremos dar un paso adiante. No último ano comezamos a debuxar a idea do aproveitamento dunha nova contorna, unha nova finca en Outes que poidese acoller cabanas accesibles para todos. Este lugar estaba moi perto de nós, e entre paseo e paseo polo bosque, ó fin o descubrimos.

Desde entón non temos parado no deseño desta idea, un proxecto de vida que nos levou a visitar lugares, descubrir regatos, pedras, árbores e arbustos, camiñando por sendeiros da aldea a primeira hora da mañá, entre as primeiras brétemas e as últimas pingueiras do orballo.

Carballos, castiñeiros, piñeiros, sobreiras, regatos, fontes, camiños, pedras, lavadoiros ou covas de raposo son só algúns dos recunchos máxicos que podemos atopar no espazo das Cabanas sen Barreiras, e que pretendemos por en valor coa axuda de amigos e veciños.

Neste blog iremos contando semana a semana como evoluciona o proxecto pero tamén, e ó mesmo tempo o noso corvo iranos descubrindo diferentes rincóns máxicos da contorna das nosas cabanas, os recursos da aldea, tradicións, patrimonio, en definitiva de todo o que envolve a esta terra que tanto amamos.