O vindeiro mércores 29 de marzo, dentro das Xornadas do Campus Vivencial de Emprendemento en Turismo Sostible e Accesible, os alumnos do CIFP Carlos Oroza de Pontevedra visitarán as instalacións de Cabanas sen Barreiras.

O CIFP Carlos Oroza de Pontevedra é un centro de formación moi implicado nas áreas de mobilidade, accesibilidade e Turismo para Todos. O instituto, ten colaborado en proxectos de turismo accesible xunto coa Fundación ONCE, e ademáis é pioneiro no desenvolvemento de proxectos innovadores, como a creación dunha campaña de crowdfunding para poñer en marcha hortos ecolóxicos, proxectos de aproveitamento turístico da camelia, Premio Pontevan, etc. Por todo isto, e gracias ó interese e implicación do equipo directivo, de profesorado e alumnos, o CIFP Carlos Oroza tense convertido nun dos centros de formación referentes en canto a Innovación e Turismo para Todos.

O interese desde instituto de formación por visitar as Cabanas sen Barreiras, xurde despois de que o equipo de Cabanas sen Barreiras participásemos en decembro de 2016 nunhas xornadas sobre Turismo Accesible organizadas en Pontevedra, nas que participou a comunidade educativa do CIFP Carlos Oroza.

A partires daquel encontro que tivemos cos alumnos e formadores do instituto, acordouse que sería interesante que o alumnado puidese visitarnos e valorar os criterios de accesibilidade in situ. 

Así, o vindeiro mércores 29 acolleremos a tódolos alumnos do centro interesados en visitarnos, nunhas xornadas formativas dentro do marco do Campus Vivencial de Emprendemento en Turismo Sostible e Accesible. As devanditas xornadas, contemplarán dous obxectivos ben claros:

1. Que os alumnos reciban unha charla sobre emprendemento sostible e innovador no sector turístico que esperamos que sirva de xermen de cultivo para que nun futuro os alumnos tamén poidan e queiran emprender.
2. Coñecer e valorar o nivel de accesibilidade das infraestruturas e da contorna dun aloxamento turístico singular como son as Cabanas sen Barreiras.

Fátima, de Promove

Tanto nós, o equipo de Cabanas que impartiremos a parte práctica das xornadas, como Fátima de Promove, que nos falará da parte máis teórica do emprendemento sostible en turismo, estamos expectantes por coñecer a tódolos alumnos que formarán parte das xornadas, do seu interese por coñecer máis a fondo o proxecto Cabanas sen Barreiras, e ver tamén que novas ideas poden aportar estas xeracións máis novas.

Deixámovos xa co programa das xornadas, e ata o vindeiro mércores!

Benvida e presentación da xornada

Responsable: Fátima

Horario: 10:00 a 10:20

Lugar: Restaurante Mesón do Portelo

Charla sobre Emprendemento en turismo 

Horario: 10:30 a 12:00

Responsable: Fátima (exposición teórica) e Lema (experiencia práctica)

Lugar: Restaurante Mesón do Portelo

Visita a Cabanas accesibles

Horario: 12:20 a 13:30

Lugar: Visita a Cabanas accesibles

Comida:

Horario: 13:45

Lugar: Mesón do Portelo en Outes