En Cabanas sen Barreiras seguimos traballando para que a Finca da Quintenla pronto mude a súa fasquía de lugar de traballo e obras, ata a o quinteiro que acollerá unhas cabanas accesibles a todas e todos, e nos convidará a descubrir recunchos cheos de maxia e paz.

Estes días estamos a construir os muros que servirán de espazos delimitadores entre diferentes zonas. Facémolo ó estilo tradicional, coas mesmas lousas que achamos na finca, e con mestres canteiros da zona.

E é que a nosa pedra di moito de seu. De sempre o muro da eira foi unha das obras senlleiras da arquitectura popular galega, mais dese tipo de arquitectura que non precisaba de arquitectos nen planos, se non que era feita pola man de artesáns, veciños e mestres canteiros posuidores de coñecementos técnicos construtivos que moitos de nós dexesaríamos ter agora.

Xa fosen de cachotería, pedra granítica arrombada unha sobre outra unida con barro, ou ben de cantería, case exclusivamente vencellados ós pazos e casas de boa liñaxe, os valados, viñan a ser os elementos que van a separar chousas, montes, fincas e casas.

Despois da privatización das terras destinadas á agricultura, na Galicia de fai un século, os pequenos propietarios de terras e montes comunais, sentían a necesidade de delimitar os seus espazos, e o xeito tradicional de facelo, era a través de pequenos valados de pedra superposta unha a unha, xa fose unidos con barro ou sen el.

Os muros tradicionais convertíronse así nun elemento máis da paisaxe galega, aínda que pouco a pouco, por falta de conservación, estes muros foron caendo e cómpre lembralos e restauralos.

Na Finca da Quintenla estamos a construír un auténtico muro tradicional como se facían na zona, os chamados muros secos, feito coas lousas da zona, arromada unha a unha, e sen elementos alleos como poida ser o formigón. Sen dúbida, será un dous poucos muros secos que aínda se poida ver nas fincas e aldeas en Galicia.

En Cabanas sen Barreiras vindicamos a recuperación da tradición, das costumes, dos usos antigos, e por iso, o noso muro será unha mostra máis do noso compromiso coa terra que nos viu nacer.

Neste pequeno vídeo, ademáis de ver o traballo dos nosos canteiros, contámosvos como eran os antigos valados tradicionais, e a importancia de conservalos.